قصيدة العامل المصرى لبيرم التونسى
ليه أمشي حافي ، و أنا منبت مراكيبكم
ليه فرشي عريـان ، وأنا منجـــد مراتبكم
ليه بيتي خربـــان ، و أنا نجــــار دواليبكم
هي كده قسمتي ؟
الله يحـــاسبـــكم
ساكنين علالي العتـب ، و أنا اللي بانيــــها
فارشين مفارش قصب ، ناسج حواشيـــها
قانيين سواقـي دهب ، و أنا اللي ادور فيها
يا رب ما هوش حسد
لكــــن بعاتبــــــــكم
من الصبــــاح للمســا ، و المطرقة ف إيدي
صابــر على ده الأسى ، حتى نهـــار عيـدي
ابن السبيـــل انكسى ، و اسحب هرابيـدي
تتعـــروا من مشيتي
و اخجــل أخاطبـــكم
ليه تهدمـــوني و نا اللي لعزكـــم بانــي
أنا اللي فوق جسمكم قطني و كتــــاني
عيلتي في يوم دفنتي ما لقيتش أكفاني
حتـــى الأسيــــــــه
و أنا راحل و سايبـكم
